RTA pietnīki forumā prezentej latgalīšu volūdai izveiduotūs resursus i reikus

25.–26. aprelī Latvejis Universitatis Zynuotņu muojā beja sasapuļciejuši Baltejis valstu digitalūs humanitārūs zynuotņu (DH) entuziasti, politikys veiduotuoji, puorstuovi nu nūzeimeigom Eiropys infrastrukturom
Foruma mierkis – pasavērt, kai i kaidūs vierzīņūs atsateista DH Igaunejā, Latvejā i Lītuvā, puordūmuot šudiņ aktualū i prognozēt, kas myus sagaida tyvuokajā nuokūtnē. Puorskotā par pādejūs pīcūs godūs padareitū RTA tyka pīmynāta storp nūzeimeiguokajim digitalūs resursu veiduotuojim Latvejā.
Foruma ūtruo dīna tyka organizāta kai teikluošonuos platforma, kurā beja īspieja īsapazeit ar Baltejis DH kūpīnu pīredzi, rast kontaktus tuoļuokai sadarbeibai, prezentēt projektus, demonstrēt izveiduotūs digitalūs resursus, reikus, kai ari izgleiteibys iniciativys. RTA filologi īpazeistynuoja kolegus ar vairuoku projektu rezultatim: 1) myusu dīnu latgalīšu tekstu korpusu MuLa2022 i runys korpusu MuLaR; 2) izstruodis procesā asūšū digitalū vuordineicu LTG Tezaurs; 3) elektroniskū vuiceibu platformu mozuok lītuotojom volūdom (tū vydā latgalīšu) OWL+.
Vysys foruma prezentacejis atrūnamys sātys lopā: Digital Humanities in Latvia – Baltic DH Forum.
Entuziastiskuo RTA filologu komanda (Sanita Martena, Antra Kļavinska, Ilga Šuplinska, Angelika Juško-Štekele, Ingars Gusāns, Anna Briška, kai ari projektu eksperte, Adama Mickeviča Universitatis profesore Nikole Naua (Nicole Nau)) turpynoj dorbu, lai latgalīšu volūda byutu plošuok lītuota ari tehnologejuos, informej Antra Kļavinska, projekta “Atvērtas un FAIR principiem atbilstošas digitālo humanitāro zinātņu ekosistēmas attīstība Latvijā” koordinatore.

Publicitātes foto, autors Jānis Brencis