Nūmetne “Sūpluok”: nūticēt sev, sovai volūdai i byut sūpluok
Nu 11. da 18. augusta Rogovkā Latgalīšu kulturys bīdreiba reikuoja jau pīktū pusaudžu i jaunīšu nūmetni “Sūpluok”, kurā beja 31 daleibnīks (nu Limbažu, Pūris, Līgatnis, Preiļu, Jākubpiļs, Leivuona, Ludzys, Kuorsovys, Bieržgaļa, Rēzeknis, Dekšuoru i cyturīnis) i kura itamā reizē nūtyka ar “Rita Wessius Foundation” (Zvīdreja) atbolstu.
Ituo goda vīns nu nūtykumim beja nūmetnis himnys studejis īroksts. Himna topuse Kristapa Viša nūdarbeibuos i īraksteita Māra Keiša “Bigmaar’s Records” studijā, tai izveiduots ari klips. Muzykys autors ir Kristaps Višs, vuordu – Kristaps Višs, Evika Muizniece, izpiļdejums – Kristaps Višs, Mareks Gusāns, video – Evika Muizniece. Himnu var nūsaklauseit vītnē YouTube.
Nūmetnis vadeituoja itymā godā beja Lolita Kivleniece-Kuzņecova, pedagogi – Ilga Šuplinska, Evika Muizniece, Sandra Juste, Kristaps Višs, Kristofers Justs, bet izdzeivuošonys prasmu meistarklasi vadeja Edgars Provejs.
“Nūmetnē sevkuru godu teik realizāta kaida konkreta ideja. Paguojušajā godā tyka lūceita saimis tema, puorvieršūt dzymtu stuostus ceļojūšā izstuodē. Itymā godā nūmetnis daleibnīki īsadzylinuoja ideņtitatis, socialūs lūmu i izdzeivuošonys vaicuojumūs, kūpeigi veidojūt sovu socialūs lūmu maskys, īmūt puorguojīņūs, apgiustūt izdzeivuošonys prasmis mežā i vuicūtīs sasadorbuot, pījimt vīnam ūtru dažaiduos situacejuos. Itei nūmetne i tuos daleibnīki dūd cereibu, ka pasauļs, kū nūdūsim taidys jaunuos paaudzis rūkuos, byus samīļuots, zaļš i drūšeibā,” soka nūmetnis pedagoge Evika Muizniece. “Nūticēt sev, sovai volūdai i sūpluok byušonai – tys ir pamatu pamats myusu nūmetnei i kasdīnai uorpus nūmetnis,” dūmojūt jau par nuokamū nūmetni, soka idejis autore, organizatore i pedagoge Ilga Šuplinska.
